ఆంజనేయులు న్యూస్, తెలంగాణ: తెలంగాణ రాష్ట్రానికి కొత్త డీజీపీ నియామక ప్రక్రియ కీలక దశకు చేరుకుంది. ఈ నేపథ్యంలో యూపీఎస్సీ ముగ్గురు సీనియర్ ఐపీఎస్ అధికారులతో కూడిన జాబితాను రాష్ట్ర ప్రభుత్వానికి పంపింది. ఈ జాబితాలో సీవీ ఆనంద్, ప్రభాకర్ ఆప్టే, సౌమ్య మిశ్రా పేర్లు ఉన్నాయి. ప్రస్తుత డీజీపీ శివధర్ రెడ్డి వచ్చే నెలలో పదవీ విరమణ చేయనున్న నేపథ్యంలో, ఆయన స్థానంలో కొత్త డీజీపీని ఎంపిక చేసేందుకు ఈ ప్రక్రియ వేగం అందుకుంది. యూపీఎస్సీ పంపిన ఈ ముగ్గురు అధికారుల్లో ఒకరిని రాష్ట్ర ప్రభుత్వం డీజీపీగా నియమించనుంది. ఇప్పటికే ఈ ముగ్గురు అధికారుల సేవా రికార్డులు, అనుభవం, పనితీరు వంటి అంశాలపై ప్రభుత్వం పరిశీలన ప్రారంభించినట్లు సమాచారం. త్వరలోనే అధికారికంగా కొత్త డీజీపీ పేరును ప్రకటించే అవకాశం ఉంది.
