మంచిర్యాల నవంబర్ 16, ( ఆంజనేయులు న్యూస్ )
రాష్ట్ర ప్రభుత్వం ప్రతిష్టాత్మకంగా చేపట్టిన భూముల సమగ్ర రీ-సర్వే కార్యక్రమం మంచిర్యాల జిల్లా తాండూర్ మండలం కాసిపేట గ్రామంలో వేగంగా కొనసాగుతోంది. సోమవారం గ్రామంలో జరుగుతున్న ఈ రీ-సర్వే ప్రక్రియలో స్థానిక సర్పంచ్ ముదాం వనజ స్వయంగా క్షేత్రస్థాయిలో పాల్గొని, సర్వే తీరును పరిశీలించారు. రెవెన్యూ మరియు సర్వే విభాగం అధికారులతో కలిసి పొలాల వద్దకు వెళ్లిన ఆమె, రైతుల సమక్షంలోనే భూముల కొలతలు పారదర్శకంగా జరిగేలా పర్యవేక్షించారు. ఈ సందర్భంగా సర్పంచ్ ముదాం వనజ మాట్లాడుతూ, భూముల రీ-సర్వే ద్వారా రైతుల దీర్ఘకాలిక భూ సమస్యలకు శాశ్వత పరిష్కారం లభిస్తుందని పేర్కొన్నారు. సర్వే సమయంలో రైతులందరూ తమ భూమి పత్రాలతో అందుబాటులో ఉండి అధికారులకు సహకరించాలని ఆమె కోరారు. ఎలాంటి అపోహలకు తావులేకుండా, ప్రతి రైతుకు న్యాయం జరిగేలా సర్వే నిర్వహించాలని అధికారులకు సూచించారు. ఈ కార్యక్రమంలో రెవెన్యూ అధికారులు, సర్వేయర్లు, గ్రామ పంచాయతీ సిబ్బంది మరియు స్థానిక రైతులు పెద్ద సంఖ్యలో పాల్గొన్నారు.
