మంచిర్యాల బస్టాండ్‌లో సులభ్‌ కాంప్లెక్స్‌ సమీపంలో చెత్త దహనంతో ప్రయాణికులకు ఇబ్బందులు!
మంచిర్యాల, అక్టోబర్ 27, ( ఆంజనేయులు న్యూస్ )
ప్రయాణికుల నిత్య రాకపోకలతో రద్దీగా ఉండే మంచిర్యాల బస్టాండ్‌లో అపరిశుభ్రత సమస్య ఆందోళన కలిగిస్తోంది. సులభ్‌ కాంప్లెక్స్‌ సమీపంలో చెత్త పేరుకుపోవడంతో పాటు, వ్యర్థాలను కాల్చడం వల్ల దుర్వాసన, పొగ వ్యాపిస్తున్నాయి. దీంతో బస్సుల కోసం వేచి ఉండే ప్రయాణికులు తీవ్ర ఇబ్బందులు ఎదుర్కొంటున్నారు. ప్రజారోగ్యానికి ముప్పుగా మారుతున్న ఈ పరిస్థితిపై అధికారులు తక్షణమే స్పందించాలని ప్రయాణికులు కోరుతున్నారు. బస్టాండ్‌ పరిసరాల్లో చెత్తను బహిరంగంగా కాల్చడం వల్ల వాతావరణం కలుషితమవుతోంది. ముఖ్యంగా మహిళలు, చిన్నపిల్లలు, వృద్ధులు పొగ, దుర్వాసనతో ఇబ్బందులు పడుతున్నారు. ప్లాస్టిక్‌ తదితర వ్యర్థాల దహనం వల్ల వెలువడే పొగ కళ్ల మంట, దగ్గు, శ్వాసకోశ సమస్యలకు కారణమయ్యే ప్రమాదం ఉంది. ప్రయాణికులకు సౌకర్యాలు కల్పించాల్సిన బస్టాండ్‌లో ఇలాంటి పరిస్థితులు నెలకొనడంపై విమర్శలు వ్యక్తమవుతున్నాయి. ఈ సమస్యపై మంచిర్యాల మున్సిపల్‌ కార్పొరేషన్‌, సంబంధిత బస్టాండ్‌ అధికారులు క్షేత్రస్థాయిలో పరిశీలన చేపట్టి, పేరుకుపోయిన చెత్తను వెంటనే తొలగించాలని ప్రయాణికులు కోరుతున్నారు. బస్టాండ్‌ పరిసరాల్లో నిరంతర పారిశుద్ధ్య నిర్వహణ చేపట్టి, ఇలాంటి ఘటనలు పునరావృతం కాకుండా చర్యలు తీసుకోవాలని విజ్ఞప్తి చేస్తున్నారు. పర్యావరణ పరిహారం విధించాలి.. బాధ్యులపై చర్యలు తీసుకోవాలి.! బహిరంగంగా చెత్తను కాల్చుతున్న వారిని గుర్తించి, నిబంధనల ప్రకారం పర్యావరణ పరిహారం విధించాలని ప్రయాణికులు డిమాండ్ చేస్తున్నారు. నిబంధనల ఉల్లంఘనపై సంబంధిత అధికారులు కఠినంగా వ్యవహరించాలని, బస్టాండ్‌ పరిసరాలను పరిశుభ్రంగా ఉంచేలా నిరంతర పర్యవేక్షణ చేపట్టాలని కోరుతున్నారు.
