• కొత్త నాయకత్వానికి ‘షాడో’ సంకెళ్లు
• పదవి సర్పంచ్‌ది.. నిర్ణయాలు మరొకరివా?
మంచిర్యాల అక్టోబర్ 1, ( ఆంజనేయులు న్యూస్ )
తెలంగాణ రాష్ట్రంలోని గ్రామ పంచాయతీల్లో కొత్తగా ఎన్నికైన సర్పంచ్‌ల పాలనపై భిన్నమైన పరిస్థితులు కనిపిస్తున్నాయి. కొందరు సర్పంచ్‌లు స్వతంత్రంగా నిర్ణయాలు తీసుకుంటూ స్థానిక సమస్యల పరిష్కారానికి చొరవ చూపుతుంటే.. మరికొన్ని గ్రామాల్లో మాత్రం తెరవెనుక రాజకీయ జోక్యాలు, ఆధిపత్య ధోరణులు కొత్త నాయకత్వానికి ఇబ్బందికరంగా మారుతున్నాయన్న చర్చ సాగుతోంది. ప్రజల చేత ఎన్నుకోబడిన సర్పంచ్‌లు స్వేచ్ఛగా నిర్ణయాలు తీసుకోకుండా, వారి వెనుక ఉన్న వ్యక్తులు లేదా రాజకీయ వర్గాల ప్రభావం కొనసాగితే గ్రామ పాలనపై దాని ప్రభావం పడే అవకాశం ఉందన్న అభిప్రాయాలు వ్యక్తమవుతున్నాయి. కొన్ని గ్రామాల్లో కొత్త సర్పంచ్‌లు ప్రజలతో నేరుగా మమేకమవుతూ వీధి దీపాలు, పారిశుద్ధ్యం, మురుగు కాల్వలు, తాగునీటి సరఫరా వంటి ప్రాథమిక సమస్యలపై దృష్టి సారిస్తున్నారు. అందుబాటులో ఉన్న వనరులను వినియోగించుకుంటూ చిన్నచిన్న సమస్యలను వెంటనే పరిష్కరించేందుకు ప్రయత్నిస్తున్నారు. అయితే మరికొన్ని పంచాయతీల్లో పరిస్థితి భిన్నంగా ఉందన్న వాదనలు వినిపిస్తున్నాయి. ఏ నిర్ణయం తీసుకోవాలన్నా స్థానిక రాజకీయ పెద్దల సూచనలు, కుటుంబ సభ్యుల జోక్యం లేదా వర్గపోరు ప్రభావం ఉంటోందని కొందరు చెబుతున్నారు. ఫలితంగా ప్రజలకు అవసరమైన పనులపై తక్షణ నిర్ణయాలు తీసుకోవడంలో జాప్యం జరుగుతోందన్న విమర్శలు ఉన్నాయి.
• సర్పంచ్‌ పదవి ఒకరిది.. పెత్తనం మరొకరిది?
ముఖ్యంగా తొలిసారి పదవిలోకి వచ్చిన సర్పంచ్‌లకు పాలనాపరమైన అనుభవం తక్కువగా ఉండటంతో వారికి మార్గనిర్దేశం అవసరం. అయితే ఆ మార్గనిర్దేశం సహకారంగా ఉండాల్సింది పోయి నిర్ణయాలపై ప్రత్యక్ష పెత్తనంగా మారితే సమస్యలు తలెత్తే అవకాశం ఉందని గ్రామస్థులు అంటున్నారు. గ్రామ సభల్లో ప్రజల అవసరాలు, వార్డుల వారీగా అభివృద్ధి పనుల ప్రాధాన్యత, స్థానిక సమస్యల పరిష్కారం వంటి అంశాల్లో సర్పంచ్‌ స్వతంత్రంగా వ్యవహరించాల్సిన పరిస్థితి ఉండాలి. కానీ తెరవెనుక నుంచి వచ్చే ఒత్తిళ్లు నిర్ణయాలను ప్రభావితం చేస్తున్నాయన్న ఆరోపణలు కొన్ని ప్రాంతాల్లో వినిపిస్తున్నాయి. అటు ఒక వర్గం ఒత్తిడి.. ఇటు మరో వర్గం రాజకీయ పోటీ.. మధ్యలో కొత్త సర్పంచ్‌. దీంతో ప్రజాసేవ చేయాలన్న ఉత్సాహంతో పదవిలోకి వచ్చిన కొందరి పరిస్థితి ‘ముందు చూస్తే గొయ్యి.. వెనుక చూస్తే నుయ్యి’ అన్న చందంగా మారుతోందన్న చర్చ జరుగుతోంది.
• ఓటు వేసింది సర్పంచ్‌కా.. ‘షాడో’ పాలనకా?
ఎన్నికల సమయంలో తమ సమస్యలు పరిష్కారమవుతాయని ఆశించి ప్రజలు కొత్త నాయకత్వానికి అవకాశం కల్పిస్తారు. అయితే ఎన్నికల తర్వాత కూడా అదే రాజకీయ ఆధిపత్యం కొనసాగితే మార్పు ఎక్కడ వచ్చిందని ఓటర్లు ప్రశ్నిస్తున్నారు. “మేము ఓటు వేసింది సర్పంచ్‌ను ఎన్నుకోవడానికా.. లేక ఆయన వెనుక ఉన్నవారిని పాలించడానికా?” అనే ప్రశ్నలు కొన్ని గ్రామాల్లో వినిపిస్తున్నాయి. ప్రజలకు జవాబుదారీగా ఉండాల్సిన ప్రజాప్రతినిధి నిర్ణయాలు తీసుకోలేని పరిస్థితి ఏర్పడితే చివరకు దాని ప్రభావం గ్రామ అభివృద్ధిపైనే పడుతుందని గ్రామస్థులు ఆందోళన వ్యక్తం చేస్తున్నారు. కొత్తగా ఎన్నికైన సర్పంచ్‌లకు అనుభవజ్ఞులైన నాయకులు, కుటుంబ సభ్యులు, మాజీ ప్రజాప్రతినిధులు పాలనాపరమైన సూచనలు ఇవ్వడం అవసరమే. అయితే ఆ సూచనలు వారి స్వతంత్ర నిర్ణయాధికారాన్ని పరిమితం చేసేలా ఉండకూడదన్న అభిప్రాయాలు వ్యక్తమవుతున్నాయి. అనుభవం లేని వారికి అనుభవం పంచాలి.. కానీ వారి స్థానంలో నిర్ణయాలు తీసుకోకూడదు. సహకారం అందించాలి.. కానీ పెత్తనం చెలాయించకూడదు. ప్రజలు ఎన్నుకున్న నాయకత్వానికి పనిచేసే అవకాశం కల్పించినప్పుడే గ్రామ పాలనలో జవాబుదారీతనం, పారదర్శకత పెరుగుతాయని విశ్లేషకులు అభిప్రాయపడుతున్నారు. గ్రామ పంచాయతీ అనేది వ్యక్తిగత లేదా వర్గ రాజకీయాలకు వేదిక కాకుండా ప్రజల అవసరాలకు ప్రాధాన్యత ఇచ్చే స్థానిక పాలనా వ్యవస్థగా నిలవాల్సిన అవసరం ఉంది. కొత్త సర్పంచ్‌లకు స్వతంత్రంగా పనిచేసే అవకాశం, ప్రజల సమస్యలను నేరుగా వినే వాతావరణం కల్పిస్తేనే పల్లెల అభివృద్ధి వేగం పుంజుకుంటుందని పలువురు పేర్కొంటున్నారు.
